ما تحبكهاش !

بسم الله الرحمن الرحيم

فى يوم من الأيام و انا فى سنة ثانية صيدلة كان علينا رسم

فى مادة الكوجنوزى

و كنت بنقل من الكمبيوتر الرسومات لأنهم بيعلقوا الرسومات فى السكشن

و المطلوب اننا نرسمها زى ما متعلقة

و طبعاً مش حتقف خمس ساعات فى الكلية عشان ترسم يعنى !

فكان الحل البديل انهم يتصوروا بالموبايل او الكاميرا و يتنقلوا من الكمبيوتر فى البيت

طبعاً أكيد واضح ان التفاصيل حتزهقك و مش حتشوف كل حاجة عشان ترسمها امال يعنى حنتعذب أزاى ..

فكانت فرق الكتابة اللى بتتولى انها تكتب السكاشن و المحاضرات و تنزلها فى المكتبة

نزلوا الرسومات راسمينها بخط ايديهم و طبعاً أكيد ناقلينها من مصدر تانى

غير اللى فى الكلية تسهيلاً مثلاً ورق السنة اللى قبلها

و بما أن دائماً و أبداً فى اختلاف فى الرسم بين يد و أخرى

فمع مرور الزمن و النقل و أحتمالية ما تحبكهاش كده حلوة خلاص كفاية

بيبقى فى..

Great variation between the origin and the copy

نسيت اقول ده لأن الناس مش بتحب ان اللى بيكتب الورق يشف الرسومات

على ما أذكر يعنى ؟

المهم انا كنت عايزة اقول انى فى تلك اللحظة

بنقل من الكمبيوتر تلك الرسومات

لأنى للأسف بحب الدقة و التفاصيل

و فى ذات الوقت و يا للعجب كنت بتكلم على الماسينجر

لأن كنت بشغلة جمبى تقريباً معظم الوقت اللى كنت بأقعدة على الكمبيوتر

حتى لو لم أكن موجودة او كنت مشغولة كان الماسينجر بيبقى مفتوح

ما اعرفش ليه كنت بسيبه يعنى !

المهم كل ما اتخنق من الرسم اشتكى ان عينى وجعتنى من النقل

او ألعن الجودة الرديئة للصور و ما إلى ذلك

و كان فى الغالب اللى قدامى يصمت حتى لا يزيد ضيقى

أعاود محاولة الرسم و بعد مدة طويلة

كتبت على الماسينجر

" انا بعذب نفسى ليه ما انقل من الورق و خلاص! "

و فى ساعتها جائنى الرد المنطقى لمن لا يعرف المأساة

"كان نفسى اقولك كده من زمااااااااان "

ابتسمت و قلت

"أيوة بلا وجع دماغ بجد "

طبعاً انا كده كنت استسلمت انى اعمل الصح و انقل من الحاجة الموثوق منها

و انى لو كنت عملت كده فعلاً زى ما قلت انى عايزة استسلم

كان زمانى رسمت غلط !

لأن فعلاً رسمة الhemlock كانت غلط انا متأكدة

عرفت الكلام ده بعد ما رحت السكشن المرة اللى بعدها

و مش عارفة كان ممكن يبقى فى حاجات تانية غلط ولا لأ ..

و حمدت الله انى لم استسلم فعلاً و انى لم أطاوع عقلى فى لحظة غضب

و انى اكملت المسيرة فيما بعد و لكن من مكان أخر

و كان غالباً اللى رسماه فى المحاضرة على الرغم انه كان سريع و مش حلو

We must be flexible to reach our accurate goal

مش نستسهل و نعتمد على غيرنا و نقول هم ادرى

لما تخلص جميع السبل إلى الدقة و تضيق الأمور الى حد لا يطاق

ساعتها بس ممكن الواحد يستسلم انه يعمل من حاجة مش متأكد منها

و لكن برده يشغل عقلة يمكن حاجة هو يلاحظها ما حدش لاحظها غيره

********