رمضان كريم ..

بسم الله الرحمن الرحيم
________________

اول حاجة كل رمضان و انتم بخير
و يا رب رمضان السنة ده يكون احسن رمضان مر علينا كلنا
معظمنا اول مرة فى حياته يحضر رمضان فى الصيف
و المفروض الدنيا حر و الصيام يبقى اصعب
بس انا حاسة ان كده احسن
عشان الواحد يحس انه صام و يحس بقيمة الصيام فعلاً
و كلنا عارفين فوائد الصيام

"نحس بغيرنا من الفقراء اللى مش لاقيين "
"الشعور أيضاً بنعمة الله اللى ممكن ما نبقاش حاسين بيها لانها على طول معانا "
و غيرة من الفوائد للبدن و الروح
فالصيام ليس صيام الجوارح فقط
و إنما صيام النفس عن المعاصى و تجنب الأخطاء
صيام عن الغيبــــــــــــة
صيام عن النميـمة
صيام حتى عن العادات السيئة اللى بتضرنا و تضر غيرنا
و المحافظة على العادات السليمة اللى بتفيدنا و أكيد غيرنا بيتعلم منا
خلينا نفكر فى الصيام من هذا المنطلق
نفكر نفسنا فى كل حاجة و كل عمل بنعملة
هل ده كويس ولا لأ ؟
هل نيتنا صافية و ثابتة ولا لغرض آخرمن امور الدنيا ؟
الكلام
هل اللى حقول ليه لازمة ولا ممكن احتفظ بيه لنفسى ؟
حتى من الأفضل عدم سماع غيرك وهو بيخطىء فى الكلام
سواء بالغيبة او النميمة او التفاخر و الكبر
نحاول نبعد قلبنا عن اى حاجة تشوبه و تأثر فيه بالسلب
عشان ربنا يبلغنا رمضان
و يكون مرحلة تغير فينا بإيجابية لحياتنا اللى جاية
***
عارفين انا بقول كده لنفسى مش ليكوا
بفكر بصوت عالى عسى ان يفيد كلامى لنفسى غيرى
فى مبدأ مؤمنة بيه من زمااااااااااااان اوى
فى كل حاجة فى حياتنا
فى الدراسة
فى الشغل
فى السعى للرزق
فى طلب العلم
حتى الأخلاق و الصفات الشخصية

كل واحد فينا بيأثر فى التانى بشكل غير ملحوظ
و حتكلم ع الموضوع ده بالتفصيل فى بوست قريب

لو واحد بيبن صفة ما سواء فية أو مش فيه
قاصد او مش قاصد
بيأثر فى اللى حواليه

مش كلنا نفوسنا قوية
فى نفوس تميل الى القوة اكثر
و أخرى تميل الى الضعف و الأستسلام

فلو انت نفسك قوية و بتتظاهر بصفه مش حلوة
او فيك فعلاً الصفة ده بس بتجاهد تتخلص منها
ما تعلنهاش و ما تعممهاش بقصد
اظهروا المحاسن فقط من الاعمال حتى لا يتأثر بك ما ضعفت نفسه
و الجميل من الصفات حتى يقتدى بيها غيرك
لا بأس ان تعترف بذنبك فأنت بشر
لكن ليكون هذا بهدف اسمى ..
كمثل ان تعترف بخطأك فى حق غيرك ليسامحك

***
خلونا مع بعض نحاول
ننقى قلبنا و نشيل منه اى شائبة
ننشر الحب بينا و نحاول نسامح غيرنا
اصعب حاجة انك تسامح حد غلط فيك
لكن فى اعتقادى لو الأنسان ده نجح انه يسامح نفسه
و هى أصعب خطوة على الاطلاق
و ان يطلب العفو من ربهُ ليسامحه
فإذا شعر بالراحة لذلك .. كأن حمل انزاح الى حد ما
فهو بالتأكيد يستحق ان تسامحه
ما تبقاش شوكة فى حلقة
ده حتى يبقى قلبك قاسى اوى
ده اجتاز أصعب خطوات و هى مسامحة النفس صدقاً
و أقدم على اهم خطوة "توبة نصوح"

***
فحاذرأن تصبح انت الظالم بعد ان كنت المظلوم